شعر واشعار بهم الدنيا

كِلّ الشعوبْ بكلّ بَلد عَن عـــزها تفخر

هذا بـ قَصرْ عـايش وهذا بـ فيـلا يفتر

وكلمــن يقول بكل تنافس .. عندي أكثر

بس بينـهم قاعـد مواطـن و ايتحــسّر

ورايـح بيفوشـر يازعَم نَــط وتِكلّــم

وقال احنه في البحرين نشربْ "ماي زمزم"

ومافيه مِثلنا بـ خيـر وعِـزّ بـلاده ينعـم

عذروني بس تدرون اظن ،، بحراني وأحلم !!

حتى الحِلـم محـرومْ منه وصـار بفلوس

ومكتوب أنا بوسط الهويّة "انسان منحوس"

أحلَم في فيـلا وفخفخـةْ ومُخبايِّ متروس

ويطلع لي "ففتي" وحلمي يتحـول لكابوس!؟

هاللي بوسط بلعـومي واقف جنه غَصّـة

ولو ساعـة نتهنـى يظل قلبـه يقرصـه

ماظل محــل يبنونه ما قال: ابغي حصـة

حتى الخبز في اللقمة نط قال: ابغي نصه؟!

في جـدول الأعـداد بس حـافظ القسـمة

والبوق يقــدر يرسمه.. حتى بالعســمة

حتى بسباق البـوق فـاز بأحلى رســمه

سَووها قرعة وبس.. طلع في القرعة اسمه!

(2) هموم الوظائف ..

هَمّ الشغلْ دوخة ،، وشَعري اتبيّضُ وحَــتّ

عندي شهادة وماهو أحسن مني مـــدحت !

جــاني القبول وجببت أمــي وفــرحت

بس وينه ؟ سوق المركزي وحمالي أجحت!؟

قــالوا تعالوا نقّسـم الاشغــال وننصــف

راشــــد ملازم عسكري .. يفنّش ويوظّـف

وعبّاس يصب ليه جـــاي وفي المكتب ينظّف

ومكيّــة اختــه بمدرسـة !! .. فرّاشة تكرُف

(3) هم السكن والأراضي

عيشتنا مُــرّة وحتى سقف البيت ذايب

ولبيوت تتفـالت عـلى ولاد الأجــانب

وكلما أجيــهم حامـل أوراقـي وأطالب!

قالو اذا بحــراني!! بس خلك في جانب

تمييـز يتحدى الشعب ،، حاضــر وماضي

بوق ونَهبْ .. توزيـع جـاحد للأراضــي

لكــن إذا كان العَـدو بنفسه القاضــي!؟

إسأل في نفسـك يا مواطــن من تقاضي؟!

(4) هـــمّ التجنيس ..

صــار الجواز بهالبلد "سجــاد مفروش"!

تمشي عليه أجناس من أجــلاف وبلـوش

ومثل الأكل عقب العزا ،، كلمن يجي يحوش

تاخذ ثلاثــة وفوقهم "عشـرين" بلّــوش

وحتى الطفل تـوّه في حضــن أمه يناقز

تلقى جـوازه بحضنه،، قبـل قماطه جاهز

وحتى أظـن ينباع "بالجمــلة" في رامـز !

وبكل دعايــة تشوفـه من ضمن الجوائز

تجنيس طــايش والشعب ضـايق في داره

وين الأصــالة والكرم .. وين الحضـارة؟

ودكم تغيــرون الأصــل؟ إخذوا البشارة:

شيعــة علي بهذا البــلد هم في الصدارة

5هـــمّ إرتفـــاع الأسعــــار ..

زدوا بعـد في البوق وســوو كلشي غالي

ويدرون مخابـيّ قحــط،، والبوك خـالي

ما أدري حـالتنا تصــير شلــون تالي؟

ناكل خبـز يابـس ونشـرب مـاي حالي؟

ديــــرة وبالثــروات مليانــة وغنيـــــة

فيهـــا شعــب ما ينـعم بلقمــة هنــية !

ياكـل غصص "مجبوس" وصـالونة " بلـيّة

وبعديــن يحلّي بـ كيكة الـ "واحـد بالمية"

ماظـل شـي في الديرة بعـد مازاد سعـره!

بعديــن اظـن حتـى المقابـر ليهـا طفـرة

ولو مـات واحـد يكتبـون بطـرف قبـره:

" دينار ونص " في السـاعة للديوان إجـرة !

(6) همّ غلاء المهور

عباس حبّ بنية حلوة وسمها نرجس

وعزّم يجيها البيت يتقدّم و يعرس

وقام الفقير يجمّع فلوسه ويكدّس

وظل يستعد للخطبة صاحبنا و يهندس

وجاها يدق الباب وعقله منه مسلوب

ومن بهدلة عمره لبس جاكيته مقلوب

استقبلوه :اهلا وسهلاً شنهو مطلوب؟

حكحك في راسه وقال: إسمع حجي يعقوب

"عباس بن جعفر موظف في المجاري"

براتب مئة وعشرين وساكن في عذاري

وسيارتي "ون إيتي" بس قصّة "فراري"

جاي بطلب بنتك واظنك عني داري

خنفس في وجهه الحجي هذا وقام يبسبِس

وقال ادري بك من هيئتك "واحد مفلّس"

وبنتي مهرها مو اقل من سعر لكزس

ولو هذا حالك تدري احسن ليك عنّس

تدفع مهر عبلة ؟ ولا مو بس ،، بعد شوف

وتسوي حفلتها في فندق "هاي" ومعروف

تقدر ؟ واذا مو قدها ارقع راسك بطوف

والباب يطوّف ليه جمل .. يعني إفهم وطوف

عباس من هالزهقة ظل يبلع في ريقه

وفي قلبه من كثر القهر شبت حريقة

ضغطه ارتفع من هلّي شافه وجته ضيقه

وقال الزواج ابداً ولا أمشي بطريقه

خلني على الطلعات وروحات القهاوي

شليّ بعوار الراس ومو ناقص بلاوي

عازب ولا عندي مرة تحنّ وتِعاوي

راح الزمان إلي العرس يشفي و يداوي

تحيات بحراني ....

}~

كلمــــآت في غ ـآية الروعه

قد رإأقت لي

تسسلم غلآتي

ربي يعطيك الف عآآآفية

مآننحرم منك

عدد الرسائل : 21 تاريخ التسجيل : 31/05/2009

روووووووووووووووعه

كلمات من واقع الحياة أخي رائد

تسلم لانامل على الطرح الرآآآقي

وبانتظارجديدك الاجمل

تقبل مروري